101

İst137a

Fāʿilātün fāʿilātün fāʿilātün fāʿilün

1.	a.	Gördi çeşmüm yine bir şāh·ı cihānı ne güzel
	b.	Sevdi cānum yine bir ẖub·ı zemānı ne güzel

2.	a.	Gerçi gülşende iken çoḳ biter serv·i sehī
	b.	Rāstī bu ṣanemüñ ḳadd·ı revānı ne güzel

3.	a.	Bitmedi bāġ·ı cihānda daẖi hiç bitmeyiser
	b.	Ruẖları güllerile gonce-dehānı ne güzel

4.	a.	Kirpigi oḳların atmaġa göñül pūtasına
	b.	Bu gözi āhūnuñ ebrū·yı kemānı ne güzel

5.	a.	Her ki gördiyse cemālin didi taḥsīnler idüp
	b.	Mihrīnün ḥaḳḳı budur rūḥ·ı revānı ne güzel

Ḥar·i Mīm

Mīm

102

İst137a

Mefʿūlü mefāʿīlü mefāʿīlü faʿūlün

1.	a.	Ey dost seni yār·i vefā-dār ola ṣandum
	b.	Bilmezlik ile gör ki nice odlara yandum

2.	a.	İnanmaz idüm kimseye öldüm dise elḥaḳ
	b.	Yalan dilüñe aldanup ey yār inandum

3.	a.	Dūr itme tapuñdan beni aġyār söziyle
	b.	Allāha ḳodum anı vü ben saña ṭayandum

4.	a.	Göz yaşı gibi sen de naẓardan düşürürseñ
	b.	Derdā vü dirīgā vü hezār āh efendüm

5.	a.	Biñ dürlü cefānile bu cān ḥulḳuma geldi
	b.	Çıḳmaz nideyin ben bu ʿālemden uṣandum

6.	a.	Bir mūyuñı virmez bu cihān mülkine Mihrī
	b.	Vallāhi vü billāhi inan kim budur andum

103

İst 137a, Aya 58b, Mil 56b

Fāʿilātün fāʿilātün fāʿilātün fāʿilün

1.	a.	İşidüp şīrīn sözin ol laʿl· ḳadümden benüm
	b.	Ḥaḳ bilür kim gitdüm oldum kendü kendümden benüm

2.	a.	Şādam ol cānān meger efġānum işidüp dimiş
	b.	Gitmemiş ʿışḳum daẖi bu derd-mendümden benüm

3.	a.	Zülfüñe ṭolaşdı dil mürġi didüm dil-ber didi
	b.	Ki ey ḥazer ḳıl kimse ḳurtılmaz bu bendümden benüm

4.	a.	Didi miskīn sen misin zülfüm giriftārı hemān
	b.	Niçe cānlar boynı baġlıdur kemendümden benüm

5.	a.	Ger size cānān gerekse cān virüñ cānān buluñ
	b.	Ġāfil olmañ mübtelālar işbu pendümden benüm

6.	a.	Muṣḥaf·ı ḥüsnüñ ḥaḳiçün bir naẓar ḳıl ḥālüme
	b.	Ḥaḳḳı ḥāżır gör begüm ḳorḳmaẓsañ andumdan benüm

7.	a.	Mihrī sen ḳılma şikāyet dest·i cevr·i yārdan
	b.	Her ne gelse hoş gelür baña efendümden benüm

104

İst138b

Fāʿilātün fāʿilātün fāʿilātün fāʿilün

1.	a.	Ey cihān ẖalḳı bilüñ kim yārdan ben dönmezem
	b.	Serv-ḳadd ü lāle-ẖad dil-dārdan ben dönmezem

2.	a.	Küfr·i zülfinde ḥabībüñ ʿışḳla cāñ virmege
	b.	Gelmişem Mansurveş ber-dārdan ben dönmezem

3.	a.	Dil-berā ʿahd eylemişdüm yoluña cānum virem
	b.	Dōstum vallāh ol iḳrārdan ben dönmezem

4.	a.	Zāhidā döndüñise ger yārdan sen nār içün
	b.	Yanayın ol nāra ben ol yārdan ben dönmezem

5.	a.	Cānına ḳaṣd eylemiş ẖūn-rīz çeşmüñ Mihrīnüñ
	b.	Vireyin biñ cānsa ol ẖun-ẖ*ārdan ben dönmezem

105

İst 138b, Aya 59a, Mil 57a

Fāʿilātün fāʿilātün fāʿilātün fāʿilün

1.	a.	Bulmadum bir gün vefā sevgülü yārumdan benüm
	b.	Geçmedi bilmem nedür devlet kenārumdan benüm

2.	a.	İñlerem ta ṣubḥ olınca nālem işitmez ḥabīb
	b.	Gerçi ʿālemler ṭolupdur āh ü zārundan benüm

3.	a.	Umma ey dil bülbüli ol gülden igen raḥm kim
	b.	Yeg anuñ ḳatında bir ẖārı hezārumdan benüm

4.	a.	Şemʿ gibi yanduġum hicrüñde görüp ehl·i ʿışḳ
	b.	Cān cirür pervāneveş almaġa nārumdan benüm

5.	a.	Cānı vir cānān yolında yārı kes aġyārdan
	b.	Yoẖsa ey Mihrī nolur ʿālemde vārumdan benüm

106

İst 138b, Aya 60b, Mil 58b

Mefāʿīlün mefāʿīlün mefāʿīlün mefāʿīlün

1.	a.	Bugün şādān u ẖandānam ki mürde cisme cān buldum
	b.	Göñül mülkine çün şāh·ı emīr·i kāmrān buldum

2.	a.	Bu eşk·i seyl·i ceyḥūnum ḳo baḥr·ı nīl olsun kim
	b.	Kenārında ḳadüñ gibi sehī serv·i revān buldum

3.	a.	Def ü çeng ü rebābile demidür ʿayş ü nūş idem
	b.	Viṣāl·i yār ile çünkim şarāb·ı erġuvān buldum

4.	a.	Nigārā tā ẖalāṣ etdüñ beni girdāb·ı ḥasretden
	b.	Ferāḥdan şādmān oldum belālardan amān buldum

5.	a.	Teşebbüh ideli Mihrī ẖadüñe verd·i ẖamrāyı
	b.	Çemende lālenün baġrın ḥasedden ṭolu ḳan buldum

107

İst138a

Mefāʿīlün mefāʿīlün faʿūlün

1.	a.	Benefşem ẖaṭṭuñ ü ḥüsnüñ bahārum
	b.	Hemān pesdür baña sevgülü yārum

2.	a.	Cemālün bāġın idelden temāşā
	b.	Cihān bāġına yoḳdur iʿtibārum

3.	a.	Ruẖun güldür baña ġonçe dehānuñ
	b.	Ḫadüñ berg·i semendür gülʿiẕārum

4.	a.	Tapuña bende‿olaldan cān ü dilden
	b.	Elüñe virmişemdür iẖtiyārum

5.	a.	İki ʿālemde yārından ilāhi
	b.	Ayırma Mihrīyi perverdigārum

108

İst 138a, Aya 60b, Mil 58b

Mefʿūlü mefāʿīlü mefāʿīlü faʿūlün

1.	a.	Çün bir nefes oldum saña ben bende ki hem-dem
	b.	ʿĀlemde niçün pes çekerem ölmek içün ġam

2.	a.	Ḳorḳutma beni nār·ı ceḥīm ile ey nāṣıḥ
	b.	Āhum şererinden yanar odlara cehennem

3.	a.	Öldürse gerek beni ẖayāl·i lebüñ ey dost
	b.	Bu ẖaste dile ḳılmaz iseñ ẕerre kadar em

4.	a.	Ġamzeñ ne ʿaceb yüregüme yaralar urdı
	b.	Vaṣluñdan irişdür meded it yaraya melhem

5.	a.	Ey dost benüm ḥālüme luṭf it naẓar eyle
	b.	Cān ḥalḳuma irişdi hemān ḳaldı vü bir dem

6.	a.	Cürmine baḳup Mihrīyi dūr itme ṭapuñdan
	b.	Olmaz bu cihānda çü günāh işlemez ādem

109

İst 139b, Aya 76a, Mil 74b

Fāʿilātün fāʿilātün fāʿilātün fāʿilün

1.	a.	Haṣretüñden sūretüm zerdi ʿayāndur lā-cerem
	b.	Firḳatüñden gözlerüm yaşı revāndur lā-cerem

2.	a.	Hem-demüm āhum olupdur mūnisem gözüm yaşı
	b.	Kimse bilmez ḥālümi derdüm nihāndur lā-cerem

3.	a.	Niçe Ferhād olmasun ʿışḳuñ beyābānında dil
	b.	Gice gündüz ẕikri sen şīrīn-zebāndur lā-cerem

4.	a.	Çünki sultān oldı dil taḥtında ʿışḳuñ dil-berā
	b.	Ser-be-ser cān mülkine ḥüḳmüñ revāndur lā-cerem

5.	a.	Ol kemān ebrūña cānum nice ḳurbān etmeyelim
	b.	Ġamzeñ oḳlarına çün sīnem nişāndur lā-cerem

6.	a.	Bende dil cānā ṭapuñdan hergiz āzād olmasun
	b.	Kim ẖayālüñ göñlümüñ taḥtında ẖāndur lā-cerem

7.	a.	Varise müşkīn ṣaçuñ būyından etmişdür güẕer
	b.	Ki ol hevāyile ṣabā ʿanber-feşāndur lā-cerem

8.	a.	Yıḳma göñlin ʿāşıḳuñ uyma raḳībe dostum
	b.	Çün bilürsin iblīsün sözi yalandur lā-cerem

9.	a.	Ḥamdülillah bezm·i ḥüsnüñde ḥabībüm Mihrīnüñ
	b.	Sāġar·ı çeşmi lebüñ ʿaksile ḳandur lā-cerem

110

İst139b

Fāʿilātün fāʿilātün fāʿilātün fāʿilün

1.	a.	Ḥüsnüñüñ üstindeki ol māh ḥaḳḳıçün begüm
	b.	Cān ü dilden bendenem ben şāh ḥaḳḳıçün begüm
	c.	Her seḥer-gāh itdügüm bu āh ḥaḳḳıçün begüm
	d.	Ṣādıḳam yoluñda ben Allah ḥaḳḳıçün begüm

2.	a.	Ḳıble yüzüñden ölince yüzümi döndürmezem
	b.	Virseler bir ḳıluña iki cihānı virmezem
	c.	Gerçi aylar yıllar oldı ben yüziñi görmezem
	d.	Ṣādıḳam yoluñda ben Allah ḥaḳḳıçün begüm

3.	a.	Eyledüm seni sevelden ġayrılardan dil beri
	b.	Dimedüñ bir gün ki hey bī-çare miskīn gel beri
	c.	Günde biñ kez ġamzeñ ursa yüregüme ẖançeri
	d.	Ṣādıḳam yoluñda ben Allah ḥaḳḳıçün begüm

4.	a.	Döndürürsem yüz yüzüñden ḳıbleden dönsün yüzüm
	b.	Senden ayruġa naẓar ḳılsa derem çıḳsun gözüm
	c.	Seni sevelden behey kāfir saña budur sözim
	d.	Ṣādıḳam yoluñda ben Allah ḥaḳḳıçün begüm

5.	a.	Ey beni Mecnūn gibi ʿışḳıyla şeydā ḳılan
	b.	Ben seni sevmekde gerçek ʿāşıḳam ṣanma yalan
	c.	A benüm çok sevdügüm vallahi billahi inan
	d.	Ṣādıḳam yoluñda ben Allah ḥaḳḳıçün begüm

6.	a.	Ġamzeñüñ peykānı sīnemde ʿayāndur dostum
	b.	Ḥalimüz ẖod gün gibi saña ʿayāndur dostum
	c.	Yoluña cān virürem bunca zamāndur dostum
	d.	Ṣādıḳam yoluñda ben Allah ḥaḳḳıçün begüm

7.	a.	Rāżıyam cānā gerek aġlat gerek güldür beni
	b.	Dönmezem senden gerek dirgür gerek öldir beni
	c.	Mihrīyem ʿışḳuñda daẖi niçe yıl yeldur beni
	d.	Ṣādıḳam yoluñda ben Allah ḥaḳḳıçün begüm

111

İst139a

Feʿilātün feʿilātün feʿilātün feʿilün

1.	a.	Dest-gīr ol ben üftādeye ey kān·ı kerem
	b.	Ki kerīm ẕat olanuñ şānıdur iḥsān kerem

2.	a.	Dergehüñ dār·ı şifā oldı çü bī-mārlara
	b.	Senden irdi ḳamu derd ehline dermān kerem

3.	a.	Dil ü cān ẖastesine luṭfuñ ile eyle ʿilāc
	b.	Ki erür ṣıḥḥate luṭfuñla anı ān kerem

4.	a.	ʿAdlüñ ābı nola dil-teşnelere virse ḥayāt
	b.	Ki virür mürdeye ʿĪsā nefesüñ cān kerem

5.	a.	Ḥaḳḳa minnet ḳademüñ baṣdı yüzüm üzre bu dem
	b.	Ḥamdülillāh ẖoş ediser yine devrān kerem

6.	a.	Nūr ile şehr·i Amāsiyyeyi maʿmūr idesin
	b.	Yapısar ʿadlüñ ile her dil·i vīrān kerem

7.	a.	Mihrī üftādeye raḥm it demidür luṭf ile
	b.	Dest-gīr ol aña ʿadlünle gel ey kān·ı kerem

112

İst 139a, Aya 59b, Mil 57b

Feʿilātün feʿilātün feʿilün

1.	a.	Dili yiter yaḳa efendicegüm
	b.	Cānı yiter yaḳa efendicegüm

2.	a.	Yüregüm yāresine vuṣlatuñuñ
	b.	Merheminden yaḳa efendicegüm

3.	a.	Ne çeker cevrüñ ile ẖaste dilüm
	b.	Ḥāline bir baḳa efendicegüm

4.	a.	Çoḳdan ʿışḳ eline ben bende
	b.	Virmişemdür yaḳa efendicegüm

5.	a.	Unudursañ belālu Mihrīyi
	b.	Seni ḳodum ḥaḳa efendicegüm

113

İst140b, Aya59b, Mil57b

Fāʿilātün fāʿilātün fāʿilātün fāʿilün

1.	a.	Didi cānān terk ḳıl yolumda cān didüm be-çeşm
	b.	Didi çeşmüm ẖūnīdür tez ol hemān didüm be-çeşm

2.	a.	Didi ebrū·yı kemānum atsa ġamzem tīrini
	b.	Sīneñi her dem aña eyle nişān didüm be-çeşm

3.	a.	Didi serv-kaddümüñ gelse ẖayāli dīdeñe
	b.	Gözlerüñ yaşın revāñ eyle revān didüm be-çeşm

4.	a.	Didi laʿlüm yādına cān meclisinde māḥażar
	b.	Nūş ḳıl dil sāġarından ṭolu ḳan didüm be-çeşm

5.	a.	Didi kim gel itlerümden yād olma bir nefes
	b.	Āsitānum kūşesinde ṭut mekān didüm be-çeşm

6.	a.	Mihrīye bir būse enʿām it didüm dil-ber didi
	b.	Sen de gel şükrāne teslim eyle cān didüm be-çeşm

114

İst140b

Fāʿilātün fāʿilātün fāʿilātün fāʿilün

1.	a.	Düşmişem derdüñe cānā derde dermān isterem
	b.	Dōstum derdüñ yeter derdüme dermān isterem

2.	a.	Gülsitān·ı ḥüsnüñi dur itme çeşmümden şehā
	b.	ʿAndelībem gül yüzüñ şevḳinde nālān isterem

3.	a.	Bu dil·i şūrīdenüñ taḥtında sulṭān bolmaġa
	b.	Bir senüñ gibi yüzi gül-berg·i ẖandān isterem

4.	a.	Dōstum kūyūñda ben ẖāra hemān ʿizzet yeter
	b.	İtlerüñle bir gice kūyuñda mihmān isterem

5.	a.	Ġamzeñüñ tīrine Mihrī sīnesin ḳıldı nişān
	b.	Ḳaşlaruñ yāsına cānā cānı ḳurbān isterem

115

İst140a, Aya60a, Mil58a

Mefāʿīlün feʿilātün mefāʿīlün feʿilün

1.	a.	ʿÖmür vefā ideriken cihānı ẖoş görelüm
	b.	Bahār faṣlı irince ẖazānı ẖoş görelüm

2.	a.	Getürdi cevr ü cefāsın dile ẖayāl·i ḥabīb
	b.	Bize hemīşe budur armaġanı ẖoş görelüm

3.	a.	Niçe sevelüm anı kim seve o ġayrıları
	b.	Muḥabbeti bizümile olanı ẖoş görelüm

4.	a.	Rakībi kendüye maḥrem idündi ʿāşıḳı yāḍ
	b.	Ol anuñile ẖoş olsun biz anı ẖoş görelüm

5.	a.	Ne gül ḳalur ne ẖu bülbül ne nev-bahār u ḥazān
	b.	Cihān ile gel ey Mihrī bu cānı ẖoş görelüm

116

İst140a, Aya60a, Mil58a

Mefāʿīlün feʿilātün mefāʿīlün feʿīlün

1.	a.	Getür götür meyi sākī bahārı ẖoş görelüm
	b.	İrişdi vaḳt·i şükufe kenārı ẖoş görelüm

2.	a.	Bu gün ki mevsim·i güldür çemende bülbül ile
	b.	Ḫurūş ü nāle ḳılup āh ü zārı ẖoş görelüm

3.	a.	Ḳomaz gülüñ nidelüm dāmenini elden ẖār
	b.	Gülün riżāsı(i)çün bāri ẖārı ẖoş görelüm

4.	a.	Yoluña tuḥfe getürdüm begüm bu cānı didüm
	b.	Didi getür sen eli boşda varı ẖoş görelüm

5.	a.	Cihān ü cānı revān it yolına Mihrī ḥabīb
	b.	İtüm dimiş saña bu īʿtibārı ẖoş görelüm

117

İst140a

Mefʿūlü fāʿilātü mefāʿīlü fāʿilün

1.	a.	Gördüm yüzüñi āhla efġāndan el yudum
	b.	Ṣordum lebüñi çeşme·i ḥayvāndan el yudum

2.	a.	Gözüm göreli sidre ḳadüñ mühtehāsını
	b.	Cān gülşeninde serv·i ẖırāmāndan el yudum

3.	a.	Ġavvāṣ olalı ol sānemüñ ʿışḳı baḥrına
	b.	Baḥr·i muḥīte baḳdum ü ʿummāndan el yudum

4.	a.	Laʿl·i lebüñle dişlerüñüñ vaṣfın işidüp
	b.	Ḥaḳḳa budur ki dür(i)le mercāndan el yudum

5.	a.	Öldürmesün igen daẖi ġamzeñ di Mihrīyi
	b.	Ben ẖūnī gözlerüñ görelü (ḳ)andan el yudum

118

İst141b

Feʿilātün feʿilātün feʿilātün feʿilün

1.	a.	Gün yüzüñ oldı gözümden ki nihān iki gözüm
	b.	Ḳarañu oldı baña işbu cihān iki gözüm

2.	a.	Dimedüñ bu daẖi āşuftelerümden biridür
	b.	Sürünürem yoluña bunca zemān iki gözüm

3.	a.	Bāġ·ı ḥüsnüñde görüp müddeʿīyi dīdelerüm
	b.	Oldı ḳanlu yaş ile şadūrvān iki gözüm

4.	a.	Gözümüñ ṣuları her cānibe bāġı ṭoplanur
	b.	Her ḳaçan seyr idesin serv·i revān iki gözüm

5.	a.	Gözüme nūr irişsün yine göñlüme sürūr
	b.	Göreyüm gün yüzüñi bir dem emān iki gözüm

6.	a.	Ḫūbken eyle vefā yoluña cāñlar virene
	b.	Böyle ḳalmaz bu güzellik de hemān iki gözüm

7.	a.	Baña raḥm etse gerek yār didüm aġyāra
	b.	Mihrīyi eyleme billāh yalan iki gözüm

119

İst141b, Aya58b, Mil56b

Feʿilātün feʿilātün feʿilātün feʿilün

1.	a.	Gör nice derde esīr olduñ ey bī-çāre başum
	b.	Bulmadum ḳaldı senüñ derdüne bir çāre başum

2.	a.	Ṭopraġuñ çünki gözüñ yaşile yoġrılmış ezel
	b.	Biz aña neyleyelüm ey yazusı ḳare başum

3.	a.	Bī-vefā yāra göñül virdüm ü bilmezlik ile
	b.	Kendü elüm ile atdum seni odlare başum

4.	a.	Vay eger güldüre düşmānlarumı yār baña
	b.	Ḳılalar ṭaʿne ṭaşiyle seni biñ pāre başum

5.	a.	Yüzümi ẖāk ideyin gitdigü yollara ḥabīb
	b.	Seni hem-ser ideyin baṣduġı taşlare başum

6.	a.	Göredursun bu gözüm bāri ölince yüzini
	b.	Kefen(in) boy(nı)na takup vara yalvare başum

7.	a.	Bilmezem baẖt·ı siyāhumla nice aġlayayın
	b.	Seni ġam ẖānelerinde yine āvāre başum

8.	a.	Müddeʿī nükteleriyle ṣanemüñ guṣṣaları
	b.	Mihrīyī öldürse bir gün seni ḳurtare başum

120

İst141a, Aya61a, Mil59a

Mefāʿīlün feʿilātün mefāʿīlün faʿlün

1.	a.	Nigār ruẖlarını lāle-zāra beñzetdüm
	b.	Benefşe ṣaçlarını müşg-bāra beñzetdüm

2.	a.	Cemāli gülşenini gördüm ü didüm elḥaḳ
	b.	Şukūfeyile müzeyyen bahāra beñzettüm

3.	a.	Çemende ḳāmetini gördüm ol gül-endāmuñ
	b.	Gözini nergis ü boyın çenāra beñzetdüm

4.	a.	Sefīne·i dili garḳ idicek gözüm yaşı
	b.	Ḥabīb dāmenini ben kenāre beñzetdüm

5.	a.	Dilinde şām ü seḥer Mihrīnüñ budur ẕikri
	b.	Vefāsı yoḳ ṣanemi rūzgāra beñzetdüm