İst117b

Mefʿūlü fāʿilātü mefʿāīlü fāʿilün

1.	a.	Ey dil bahār faṣlı vü çün devr·i lāledür
	b.	Lā dimezüz ki ʿāşıḳa sevdā ḥavāledür

2.	a.	Bezm·i çemende ṣaḥn·ı gülistānda devr iden
	b.	Sāḳī elinde sāġar ü sāfī piyāledür

3.	a.	Dil-ber cemāli üzre ʿarāḳlar ki dizlüdür
	b.	Gül yapraġında ṣanasın anı ki jāledür

4.	a.	Maʿşūḳ elinde cevr ü cefā vü ʿitāb ü nāz
	b.	ʿĀşıḳ dilünde şām u seḥer āh u nāledür

5.	a.	Bu rūz içünde kūşe·i gülşende Mihrīyā
	b.	Devlet anuñ ki hem-demi bir çeşm·i āledür

22
Ġazel·i Ġarra

İst118a, Aya46b, Mil44a

Fāʿilātün fāʿilātün fāʿilātün fāʿilün

1.	a.	Eşk·i çeşmümden olur cūş itdügi ırmaġlar
	b.	Dūd·ı āhumdandur ebr olduġı her dem daġlar

2.	a.	Rūz u şeb yaşlar döker dolāb ser-gerdān olup
	b.	Girye vü zārī ile ṭurmaz neyiçün aġlar

3.	a.	Nālem işitdükçe ditrer berg ārām eylemez
	b.	Yaşumı gördükçe her āb·ı revānlar çaġlar

4.	a.	Gözlerüme sensüz ey rūh·ı revānum bir nefes
	b.	Gülşen ile neyleyüm külẖān görinür bāġlar

5.	a.	Geldüġüñce güldürürsin gül gibi dil bülbülin
	b.	Gitdüġiñce lāleveş baġrumda ḳorsun daġlar

6.	a.	Firḳatüñ zaẖmıyla Mihrī çoḳdan olurdı helāk
	b.	Müstedām ol yine vaṣluñ aña merhem baġlar

İst118a

Fāilātün fāilātün fāilātün fāilün

1.	a.	Ol mübārek ẕātuña her demde ṣıḥḥat yaraşur
	b.	Ol muṭahhar cismüñe her anda rāḥat yaraşur

2.	a.	Dār·ı rifʿatde ṣafā vü zevḳ(i)le leyl ü nehār
	b.	Ṣaḥn·ı şıḥḥatde güzel ẖānumla ṣoḥbet yaraşur

3.	a.	Ol vücūd·ı nāzenīnüñden ırāġ olsun elem
	b.	Düşmenüñe ẖāne·i ġam içre miḥnet yaraşur

4.	a.	Teb niçün ṭutar seni ṭutsın rakīb·i kāfiri
	b.	Saña ṣıḥḥatler ʿadūña renc ü ẕillet yaraşur

5.	a.	Tīġ·i ḳahr ile ʿadūñuñ başını ḳaṭʿ etmege
	b.	Ẕātuñā cürˀet vü hem bāzūña ḳuvvet yaraşur

6.	a.	Ney gibi iñleyen her dem ḥasūd olsun müdām
	b.	Çeng ü ḳānūn ile her dem saña ʿişret yaraşur

7.	a.	Ḥaḳ baġışlasun ilāhī seni ol vālīdeñe
	b.	Kim anuñ bir dānesisin saña rif'at yaraşur

8.	a.	Ḥamdülillāh kim mülāḳāt oldı Mihrī-dāʿīye
	b.	Dir görenler ẕātuña erkān·ı devlet yaraşur

İst119a

mefʿūlü mefʿāīlü mefʿāīlü feʿūlün

1.	a.	Ol kān·ı vefā ẖoş bize gösterdi keremler
	b.	Baṣdı kereminden yüzüm üstine ḳademler

2.	a.	ʿĪsī nefesi eyledi biz mürdeyi zinde
	b.	Ġam-gīn dilimüz buldı ferāḥ gitdi elemler

3.	a.	Luṭfiyle ḳıldı dil·i vīrānemi māˀmur
	b.	Göñlüñ ẖoş ide her dem anuñ ẖūb-ṣanemler

4.	a.	İtdi bizi ol ẕāt·ı şerīfyile müşerref
	b.	Görmeyiserüz ḥaşre degin ġuṣṣa vü ġamlar

5.	a.	Mihrī niçesi şerḥ idesin vaṣfı beyānın
	b.	Takrīr idemez dil ne ẖu taḥrīr ḳalemler

İst119a, Aya43a, Mil40b

Feʿilātün feʿilātün feʿilātün feʿilün

1.	a.	(elif) Ey ḳāmeti raʿnā vü eyā ẖūb-nigār
	b.	Bitmedi ḳaddüñe beñzer daẖi bir serv ü çenār

2.	a.	(be) Bugün gülşen·i ḥüsnüñde ḳo efġān idelüm
	b.	Yaraşur ṣaḥn·ı çemendeki ide feryād hezār

3.	a.	(te) Temāşā iderüz vaṣluñı luṭfuñla bugün
	b.	Dil·i dervīşe ʿaṭā eyleseñ ey şāh ne var

4.	a.	(s̲e) S̲enā-ẖ*an olalı bülbül·i cān gülşende
	b.	Ḥüsnüñe ḳarşu olur şām u seḥer ẖoş güftār

5.	a.	(cim) Cemālüñi görüp ġayre naẓar eylerisem
	b.	Dōstum tīr·i müjeñle iki gözümi çıḳar

6.	a.	(ḥa) Ḥayātum gider ey dōst yüzüñ görmeyicek
	b.	Sensüzin di imdi nice eyleye cān tende ḳarār

7.	a.	(ẖı)Ḫayālüñ yazalı naḳşını dil levḥasına
	b.	Gözedür ḳıble-nümā gibi gözüm leyl ü heḥar

8.	a.	(dal) Dād etmeziseñ dādumuzı ẖūni gözüñ
	b.	Beni nā-ḥaḳ yere öldürse gerek āẖir·i kār

9.	a.	(ẕel) Ẕāhid güzeli sevmege tevbe etmiş imiş
	b.	Döndi cürmini bilüp itdi yine istiġfar

10.	a.	(re) Revā gördi felek biz nidelüm gülşende
	b.	Bülbüle āh u fiġān hem-dem ola goncaya ẖār

11.	a.	(ze) Zülfüñde beni ʿışḳ(i)le Manṣūr gibi
	b.	Cān fedādır yoluña eyleye cānum ber-dār

12.	a.	(sin) Senden çevirürsem yüzümi itme mecāl
	b.	Kes ḳalem gibi başumı dilümi yar ey yār

13.	a.	(şın) Şehā ẓulmün eli şehr·i dili yaḳdı diriġ
	b.	Çıkısar cānı bedeninden idiser terk·i diyār

14.	a.	(ṣad) Ṣandum ki seḥāb içre niḥān oldı ḳamer
	b.	Yār ḥüsninde meger itmiş imiş zülfüñi tār

15.	a.	(ḍād) Żaʿf·ı ġam·ı hecrüñle ḳo ölsün yeridür
	b.	Dil·i āşufte ki cānā aña pend etmedi kār

16.	a.	(ṭı) Ṭavāf·ı ḥaremüñ eylemişem bunca zemān
	b.	İʿtiḳādum budur ey dōst beni yaḳmaya nār

17.	a.	(ẓı) Ẓulm eyleme ʿāşıḳlaruña luṭf eyleye
	b.	Eylemişdür bunlaruñ ʿışḳuñ odu cānına kār

18.	a.	(ʿayn) ʿAynuñ dil ü cānlar mı kodı ʿālemde
	b.	Ki itmedi ġamzelerüñ tīr ile anı şikār

19.	a.	(ġayn) Ġāyetde ṣafādur k'ola yanuñda habīb
	b.	Ol saña nāz ide sen anı idesin būse kenār

20.	a.	(fe) Firāḳuñ gecesinde şu ḳadar āh etdüm
	b.	Ki oldı dil āyinesi derdüm ile jeng ü ġubār

21.	a.	(ḳaf) Ḳandīl·i ruẖuñdan yaḳar iy dōst delīl
	b.	Ki güneş ʿāleme envāruñı eyler izḥār

22.	a.	(kef) Göñlüm evi vīrānuñı māˀmūr itdi
	b.	Ḥamdülillāh hele ʿışḳuñ olalıdan miˀmār

23.	a.	(lam) Laʿl·i lebinüñ yādına bir meh-rūnuñ
	b.	Ḫūb olur nūş ide mül çün irişe vaḳt·i bahār

24.	a.	(mim) Mihrī düşeliden heves·i ʿışḳuña yār
	b.	Oldı rüsvāy·ı cihān gitdi ḳamu ġayret ü ʿār

25.	a.	(nun) Nem var daẖi ʿışḳuñda budur taḥsīlüm
	b.	Dilde ġam dīdede nem sīnede āteş her bār

26.	a.	(vav) Var itdügüñe ṣoñra peşīmān olasın
	b.	Gül yüzüñ dāˀīresini ṭuṭıcak bir gün ẖār

27.	a.	(he) Hebā eyleme sāʿyini bu ben miskīnüñ
	b.	Çoḳ zamāndur ki yoluña dil ü cān etdi nis̲ār

28.	a.	(lamelif) Lāˀiḳ ola mı ki ʿaceb ḳapuñda
	b.	İtlerüñle bile ben daẖi olam ẖiẕmetkār

29.	a.	(ye) Yeter cevr ü cefāñile beni şām ü seḥer
	b.	Dōstum ẖāne·i ġamda iñilet zār u nizār

İst119b

Feʿilātün feʿilātün feʿilātün feʿilün

1.	a.	Bize meyl eyleridi geh geh o çeşm·i ḳaralar
	b.	Menʿ iderler oları bir iki yüzi ḳaralar

2.	a.	Düşeli ʿışḳı hevāsı(y)la deryā·yı ġama
	b.	Görmedi zevraḳ·ı dil ḥadd ü kenār ü ḳaralar

3.	a.	Çekse zülfini ṣanem ruẖları üstine n'ola
	b.	Yaraşur Kaʿbenüñ örtüsi ki ola ḳaralar

4.	a.	İtdiler ʿāşıḳ·ı şūrīdelerüñ ʿışḳunı pāy
	b.	Ḳorḳaram vaṣluña daẖi geleler el ḳaralar

5.	a.	Cānı vir yār işiginde gel ey dil ṣādıḳ(i)señ
	b.	ʿĀşıḳ oldur ki anuñ ṭopraġa ḳanın ḳaralar

6.	a.	ʿIşḳ bābın daẖi bir vech(i)le taḥrīr idemez
	b.	Miḥrī kim bunca zamān defter ü divān ḳaralar

İst117b

Fāʿilātün fāʿilātün fāʿilātün fāʿilün

1.	a.	Bir ṣanem egnine almış sīm ü zer ḳaftānlar
	b.	Yaraşır yolında ḳurbān olsa yüz biñ cānlār

2.	a.	Bu libāsuñ vaṣfın işitse meleklerden revān
	b.	Çāḳ ideydi ḥüllesini ḥūrī vü ġılmānlar

3.	a.	Kevkeb·i seyyareveş seyreyledükçe gündüzin
	b.	Ṭolmuşidi her ṭarafdan māh ile meydānlar

4.	a.	Başumı ṭop eylemişdüm ben eġerçi çalmaġa
	b.	Dil-rübālar eylemişidi zülfüni çevgānlar

5.	a.	Der-gehüñden dil-berā dūr itme Mihrī bendeñi
	b.	Gerçi çokdur āsitānuñda senüñ der-bānlar

İst 117b, Aya47a, Mil45a

Mefʿūlü mefāʿīlü mefāʿīlü feʿūlün

1.	a.	Bī-çāre göñül bilmezem āvāre nedendür
	b.	Dermān nedürür bilsem aña çāre nedendür

2.	a.	Her dem felegüñ cevri ile yār cefāsı
	b.	Bilsem ki bu ben baẖt·ı siyeh-kāre nedendür

3.	a.	Çeşmi baña vaṣlını ḥarām eyledi yārüñ
	b.	Ben ḳanı ḥelāl itdüm o ẖūn-ẖ*āre nedendür

4.	a.	Çün delmezimiş ġamzeleri ẖançeri baġrum
	b.	Bes bu yüregümde görinen yāre nedendür

5.	a.	Can bülbüli nālān ide gülzār·ı ẖaddüñden
	b.	Sen yüz viresin iy yüzi gül ẖāre nedendür

6.	a.	Ben ayaġuñı öpmeġe cānlar ḳılam īs̲ār
	b.	Rāygān viresin būse sen aġyāre nedendür

7.	a.	Mihrī çeke cevrüñi vü luṭfuñ göre aġyār
	b.	Devlet aña ẕillet bu cefā-kāre nedendür

İst120a

Mefʿūlü mefāʿīlün mefʿūlü mefāʿīlün

1.	a.	Cān boynıña zülfeynüñ ʿanber-resen olmışdur
	b.	ʿIşḳ ehline dergāhuñ ḥubbü'l_vaṭan olmışdur

2.	a.	Hicrüñle gözüm yaşı yaġmur gibi yaġaldan
	b.	Başdan başa bu ʿālem çayır çemen olmışdur

3.	a.	Dil bülbüli feryādın artursa ʿaceb midur
	b.	Şeydā ḳılan anı sen ġonca-dehen olmışdur

4.	a.	Cevrüñle beni cānā öldürme taḥammül it
	b.	ʿIşḳuñ ġamıyla ẖod baña olan olmışdur

5.	a.	Yoluñda senüñ cānā bilmem ne günāh itdüm
	b.	Cevrüñ baña aġyāra luṭfuñ neden olmışdur

6.	a.	Ḥaḳḳā ḳad ü ẖaddüñüñ kim olsa hevāsında
	b.	Tābūt aña serv olup gülden kefen olmışdur

7.	a.	Gül ruẖlaruñuñ çoḳdur ʿuşşāḳ·ı dili ammā
	b.	Çeşmine raḳībüñüñ Mihrī diken olmışdur

İst120a

Feʿilātün feʿilātün feʿilün

1.	a.	Cān virürem saña be-hey kāfir
	b.	Bir naẓar kıl baña be-hey kāfir

2.	a.	Sen gülidüñ çemende ben bülbül
	b.	Ol zamānı aña be-hey kāfir

3.	a.	Beni cevrile sen öldürmek
	b.	Kim görüpdür revā be-hey kāfir

4.	a.	Çekmişem ben cefāñı biñ kerre
	b.	Sen de it bir vefā be-hey kāfir

5.	a.	Bizi bir būseyile yād itseñ
	b.	Olmaz idi ẖaṭā behey kāfir

6.	a.	Dil ki derd-mendüñdür evvelden
	b.	Derdine ḳıl devā be-hey kāfir

7.	a.	Cān u dilden saña bu ʿālemde
	b.	Mihrīdür mübtelā be-hey kāfir

İst121b, Aya39b, Mil37a

mefʿūlü fāʿilātü mefʿāīlü fāʿilün

1.	a.	Çeşmüme dil uyup ruẖ·ı dildāra gitdiler
	b.	Göz göre gör beni nice odlara atdılar

2.	a.	Dil düzdi bāġ·ı ḥüsnine ol ṣunmasun diyü
	b.	Zülf·i siyāh·ı mārı gülistānda yatdılar

3.	a.	Gül ruẖlarına beñzedüm anuñ dimiş meġer
	b.	Sūsenler üstine yüriyüp dil uzatdılar

4.	a.	Nāzüklikile meyvesin aldum dehānınuñ
	b.	Gör bāġbānı yaʿni ki uġrı gözetdiler

5.	a.	Öldürmege getürdi diyü müddeʿīyi yār
	b.	Çeşmiyle ġamzesi baña birden göz etdiler

6.	a.	Didüm raḳībī dāra ʿaceb aṣdılar mı ola
	b.	Bir ẖayr aġızlu didi ki çoḳdan uzatdular

7.	a.	Deprendügince ḳuvvet virür cāna leblerüñ
	b.	Şīrīn sözüñ kelāmına şeker mi ḳatdılar

8.	a.	Bī-mihri Mihrī sevme didüm pend ṭutmaduñ
	b.	Her cevri ki itdiler saña anlar ẖoş etdiler

İst121b

Fāʿilātün fāʿilātün fāʿilātün fāʿilün

1.	a.	Çekmeyen bilmez nedür yārüñ cefāsı özgedür
	b.	Düşmeyen bilmez nedür hicrüñ belāsı özgedür

2.	a.	Olmayan ʿāşıḳ ne bilsün ehl·i ʿışḳuñ ḥālini
	b.	Şerḥ olınmaz bu beyānuñ mācerāsı özgedür

3.	a.	Rāstī seyr eyle ʿuşşāḳı nevālar gösterür
	b.	Dilleri ḥayrān ider ʿışḳuñ ṣadāsı özgedür

4.	a.	Ḫalvetüñde zāhidā ʿayb itme ehl·i ʿışḳa sen
	b.	Künc·i ġamda ʿāşıḳuñ da bī-riyāsı özgedür

5.	a.	İşüñ altun itmek isterseñ yüzüñ zer eylegil
	b.	Ṭālib·i iksīr·i ʿışḳ ol kimyāsı özgedür

6.	a.	Būy·ı zülf·i dil-berüñ ġayrin getürme ey ṣabā
	b.	Bu dil·i sūzānuma ḳıble hevāsı özgedür

7.	a.	Bir ṭabībe ben didüm bīmār·ı ʿışḳa çāre ne
	b.	Didi dilber vaṣlıdur anuñ devāsı özgedür

8.	a.	Bir perīnüñ ḥalka·i zülfine nā-gāh oldu ṣayd
	b.	Şimdi Mihrī miskīnüñ dām·ı belāsı özgedür

İst 121a, Aya42a, Mil39b

Fāʿilātün fāʿilātün fāʿilātün fāʿilün

1.	a.	Ḫürrem iden ʿālemi cānā cemālüñ baġıdur
	b.	Dōstum ʿuşşāḳa raḥm it gel ki ḥüsnüñ çaġıdır

2.	a.	Bülbül iñler ẖārdan ben aġlaram aġyārdan
	b.	Müstedām olsun bizümle ẖayli derd ortaġıdur

3.	a.	Rīsmān·ı zülfüñle niçün baġludur boynum didüm
	b.	Gösterüp çeşmin didi bu kafirüñ ṭutsaġıdur

3.	a.	Ḥasretinden aġlaram sen Yūsufuñ Yaʿḳupveş
	b.	Gözlerüm yaşı dükenmez ṣanki Nīl ırmaġıdur

5.	a.	Çekmezidi bir nefes ẖāruñ cefāsın neylesün
	b.	Līk bülbül gülsitān içre gülün ṭutsağıdur

6.	a.	Bezm·i ḥüsnüñe vücūdum şemʿdür pervāne dil
	b.	Bu yanan cānum fitīlidür yüreġüm yaġıdur

3.	a.	Dehr elinden bir ṣafā cāmını nūş ettürmedün
	b.	Ṣunduġuñ her dem felek Mihrīye biñ ṭas āġıdur

İst121a, Aya46b, Mil43b

Mefʿūlü fāʿilātün mefʿūlü fāʿilātün

1.	a.	Ḫaṭṭuñ benefşe ẖaddüñ ẖoş yāsemīne beñzer
	b.	Gülzār·ı ḥüsnüñ ey dōst cennet içine beñzer

2.	a.	Ḥaḳḳın di ey felek sen gördüñ mi devr idelden
	b.	Ḫalḳ·ı cihānda bir ẖūb bu nāzenīne beñzer

3.	a.	Yüzüñ görüp ḥasedden bedr olmasun ḳamer hiç
	b.	Öykinmekile ḳaçan sen meh-cebīne beñzer

4.	a.	Ḥalḳa oldı firkatüñden ḳāddüm benüm ey bī-raḥm
	b.	Baġruñ senüñ ʿacebdür seng·i nigīne beñzer

4.	a.	ʿIşḳuñ yolında cānā cān virdigüm görenler
	b.	Dir ehl·i ʿışḳ içinde Mihrī güzīne beñzer

İst122b

Feʿilātün feʿilātün feʿilātün feʿilün

1.	a.	Dil-berüñ bāġ·ı cemāli ki kış u geh yaz açılur
	b.	Ṣan cihān gülşenidür gülleri ṭurmaz açılur

2.	a.	Nice şerḥ eyleyeyin ġonca-dehānı ẖaberin
	b.	Nā-gehān nār·ı nihāndan yine bir rāz açılur

3.	a.	Ḳorḳaram laʿl·i lebinüñ ẖaberin söylemeġe
	b.	Nā-gehān genc·i nihāndan yine bir rāz açılur

4.	a.	Her ḳaçan kim iderem ʿışḳ·ı hevāsında sedā
	b.	Āhumuñ perdelerinden nice şehnāz açılur

5.	a.	Araram ḥüsn kitābın ki vefā resmi bulam
	b.	Hā cefā bābı(y)la mesˀele·i nāz açılur

6.	a.	Muṣḥaf·ı ḥüsnüni gördüñ çün oḳı sūre·i nūr
	b.	Mihrī ʿāşıḳlara ʿālemde bu fāl az açılur

İst122b

Fāʿilātün fāʿilātün fāʿilātün fāʿilün

1.	a.	Dil ser·i zülfüñe ber-dār olmaġa cānın sürer
	b.	Ölmeġe yir ister uşda geldi urġānın sürer

2.	a.	Boynuma ṭaḳsañ n'ola cānā kemend·i zülfüñi
	b.	ʿĪd·i vaṣl irse ḳaçan her kişi ḳurbānın sürer

3.	a.	Ṭār ü mār itmiş ruẖında yār zülf-i ʿanberīn
	b.	Ṣanasın ṭāvūsdur gülşende cevlānın sürer

5.	a.	ʿĀşıḳa maʿşūḳ çün cevr ide gelmişdür ezel
	b.	Terk·i ʿādet eylemez her kişi erkānın sürer

5.	a.	Mihrī·yi dil-ẖastenüñ ḥālin ṣorarsa yāra diñ
	b.	Bir nefes ḳalmışdurur ammā āh ol cānın sürer

İst122b, Aya41b, Mil39b

Feʿilātün feʿilātün feʿilātün feʿilün

1.	a.	Dili virdüm yalıñuz ṣanma saña cān biledür
	b.	Dil nedür cān daẖi cānā saña ḳurban biledür

2.	a.	Geçdi ey ḳaşı kemān ġamzeñ oḳı cāndan öte
	b.	Daẖi çeşmüñ niçe bir sīneme müjġān biledür

3.	a.	N'idelüm gözden ıraġ oldıñise dōst yeter
	b.	Çün ẖayālüñ dil·i vīrānuma mihmān biledür

4.	a.	Görüp ol yāri baña söylemesün diyü raḳīb
	b.	Muttaṣıl sāye gibi gör nice şeyṭān biledür

5.	a.	Mihrī bülbül gibi efġānuñı dilden ḳoma kim
	b.	Lāle ẖaddinde anuñ çün gül·i ẖandān biledür

İst122a, Aya42b, Mil40a

Mefʿulü fāʿilātü mefāʿīlü fāʿilün

1.	a.	Düşmenler üstine ṣanemüñ el üşürdiler
	b.	Yanlı ẖaberle uş beni gözden düşirdiler

2.	a.	Hecr āteşiyle dil ẖo[d] ezelden kebābidi
	b.	Sīnemde yaḳdılar cigerümde pişürdiler

3.	a.	Öldürdüm idi müddeʿī bir çelmeyle tīz
	b.	Neylersin itler ʿav ʿavı ʿaḳlum şaşurdılar

4.	a.	Öldürmesi ġazā diyü ʿuşşāḳ cemʿ olup
	b.	Kāfir raḳībe her birisi bir ṭaş urdılar

5.	a.	Derdlü yürek ey Mihrī cefāya ideydi ṣabr
	b.	Cevr·i zamāna ẖūbları ḥadden aşurdılar

İst122a

Fāʿilātün fāʿilātün fāʿilātün fāʿilün

1.	a.	Didi dil-ber ḥüsnümüñ ḥayrānı ol didüm be-ser
	b.	Didi her dem ʿışḳumuñ giryānı ol didüm be-ser

2.	a.	Didi ḥüsnüm gülistānınuñ hezārān derdle
	b.	Rūz u şeb bülbül gibi nālānı ol didüm be-ser

3.	a.	Didi Kāʿbe kūyumuñ itseñ ṭavāfın ṣıdḳ(i)le
	b.	ʿĪd·i vaṣlumuñ hemān ḳurbānı ol didüm be-ser

4.	a.	Didi yüz sür āsitānumda ṭurup leyl ü nehār
	b.	Sen de hiẕmetkārumuñ der-bānı ol didüm be-ser

5.	a.	Didi ey Mihrī saña cānān gerekse cān vir
	b.	İmdi gel ʿışḳum yolında fānī ol didüm be-ser

İst122b, Aya39b,Mil37b

Fāʿilātün fāʿilātün fāʿilātün fāʿilün

1.	a.	Zülfüñ ü ḳaşuñ ḳadüñ gördüm ki cān andan çıḳar
	b.	Bunlara cān virmeyen elbette cānāndan çıḳar

2.	a.	Tīr·i ġamzeñ ṭutmasun jengār ġamdan dōstum
	b.	Yüregümi yar gel peykānuñı ḳandan çıḳar

3.	a.	Bī-güneh maḥbūsdur çāh·ı zenaẖdānuñda dil
	b.	Zülfüñe aṣ ḳurtar ol miskīni zindāndan çıḳar

4.	a.	Ben vefā umduḳça ol bī-raḥm dil-ber āh kim
	b.	Cevri ḥadden aşurur nāzile orandan çıḳar

5.	a.	Ġamzesi düzdi bulup dilde ẖayālī ẖaznesin
	b.	Didi ancaḳdur ki dirler genc vīrāndan çıḳar

6.	a.	Zülfüñe baş ḳoşdı ġamzeñ yaḳdı diller şehrini
	b.	Şimdi fitne ʿāleme sen çeşm·i fettāndan çıḳar

7.	a.	Müddeʿī söziy(i)le elden çıḳardum yāri āh
	b.	Her geh şeyṭāna uyar elbette īmāndan çıḳar

8.	a.	Ey belā-keş Mihrī sen beñzer Belāyī neslisin
	b.	Saña dāˀim bī-vefālar ġālibā andan çıḳar